Dulous Elipaw
  Rev. Vako Biography
 


ein Bild

              Rev. Vako (Methodist Theological Seminary, Seoul: 2007)

Rev. Vako Biography

Moh: Rev. Vako

Pinoh: January 6, 1962 (document zy liata June 1, 1962)

Lapino moh: Dawsu (Ngopaw)

Nopawzy: Htp Chakao nata Pino Temai

No pakia no: May 9, 1991

Ordination: Pro. 18 April, 1990 by Rev. Raha (late) Sabypi Khithieh; Ordination: 12 March, 1991 by Rev. K. Teitu (late)  at Satu khih

Hawtizy: Eli (21. 8. 92), Lili Si (15.2.95) nata Va Pawpi (24.12.2000)

Pho: Teikhu

Khi:  Sabyhpi  

Degrees: B.Th (MIT: 1990), M. Div (MIT: 1999), M. Th (Hanil: 2004).

Address: No 265 A, Khin Oo Lane,   10  Block, Hlaingthazar Township, Yangon City, Myanmar:  Nearest phone: 244390: Korea phone 82-010-2200- 1962                 

Hla khochaipa: "Zisu Kyh Na Pacha Eily Ngaita"

Hla aphipa: Hla a phipa hlu kaw taruata khasia leipata tahma y tla khao vei.

Chabu a rohpa: Dawchhau Theology: Towards a life-Based Theology,  2006.

Articles

1. Chyhsa Sohpa ama tahpa cha, 2. Mara Tla liata a pawpa Pawpi zy, 3. Thaina a chuhaipa Mara Thyutliazy, 4. Marapa nata Mara rah 5. Marapa thokha palohruhpa maniah a pahni kaw chypazy, 6. Pawpi Kheita eima tly aw? 7. September 11 Saipazi Heihna, 8. Thawngthabia le Nunphun, 9. Ahodah Apal? 10.  The Progress of Myanmar Christian Contextual Theologies in today. 11. A glimpse Study of Lorrain Theology. 12. Chyhsa sohpa ama tahpa cha.  13. A Brief history of Mara Evangelical Church. Centenary Khohla Mara Thyutlia,

Rev. Vako Nopawzy:  Khazohpa ta ano a pahno maleipa St. Chakao he ano chyhsa cha awpata vaw pachhuahno haw ta, a vaw satlia nata Ano Khazohpa cha thlai a vaw ngiapa haw ta. St Chakao he unawh 6 nata sitaeno pakha a vaw hneipa acha. Apaw he Khithau chata ano cha Ai Chi a vaw cha. Apaw Khithau he sipasa kawpa achapa vata ano chhao cha avaw chu thei leipata a y. Alapi no chhao he ano Ai-Chie reipa hawhta chaleipata ano hawhta sipasapa Ls. Temai (Liemeizua) a vaw hia. Abeipa ngiachhina vata a Satliana tawhta pupa lata avaw lie ta chatawhta awnanopa liata hyutuhpa taita chakaona a vaw hnei.

Ls.Temai nata ko no ama vaw hnei tawhta sachano utheipa vaw hnei ei ta amo cha Haiva a cha. Chatawhta panona saw chano hnei heihta Paw-U tahpata amo ama bie. Paw U he a laisa hawpata 1975 na liata a paha haw. Chatawhta keima he vaw ei vaw pi. Keima tawhta Pheido, Paichho, Ko-U nata Tatano zy ama vaw cha. Chavata Vako (tahma Eli Paw) he unawh papali nata sitaeno pano ahneipa a cha. Abeipa ta ama zydua he vaw khasia ei ta a utheipa Haiva na tah leipata cha tano taita atlapa ta ama y chyu.

Vako School A Vaw Kia Pathao:  Vako he dyhchhipa ochhoh tawhta a pipa a chapa hleikho ta ochakiochapa liata a ypa a cha. Chyhsa no-uriah achi kawpa chata a sapa ko 9 apha tawhta Primary a pathaopa a cha. Achy viana daihti liata cha a viasazy hry liata a ypa chhao ta chano zy he a viasa via tyh ta arichazy hry liata hmiakai kawpa chyhsa cha vei. A moh thai viapazy y khohthai leina Sunday school zy, hla achuna zy, bie achuna zy lachha deikua a pahasa kaw. Solfa pa he Mc. Toke (Locheipa) liata achu ta athai kaw. Primary liata chool a kia chhoh zydua liata sakhana liata y lyma ta chahrasala athai kawpata la chahlei vei. Chavata 1982 na liata pyhraw he a vaw failed haw. A ngia achhi hmeiseih.

1972 Primary pychhai,  1976 Primary pypali, 1979 Py chari, 1981 pyhraw ta a vaw chu lai. 1983 liata pyhraw a passed. 1985-1990 he B.Th achu. 1991 liata noh a pakiah. 1995-1999 he M.Div achu. 2003-2004 he M. Th achu. 2006-2007 he Th.M achu heih.


ein Bild

Elipaw nata ama no ama cha (yangon liata) February, 2007. Novah ama cha tawhta ko (16)  hawna daihti liapa photo a cha 

Khazohpa Rai chakaona a vawthao:        Noh kha za ta ei vaw theipa thatih cha ei ma tlyma a cha tahpa hawhta a vaw cha. Pyhraw ezana result vaw chata ado va tlyma 17 July, 1983 za liata ei palyusa. Pyhraw passed napa cha radio tawhta theipa chata eily zi reitheipa cha vei. Py chaki ei chuno ta evangelist rai hria ba awpata achhuah nata chahrasala ei ko tlo leipa sakha nata ei paw siehnai na khokhei leina vata tahma pyhraw ei vaw passedpa cha ei paloh liata seminary la azu awpata khacha a vaw la lyma ta.

       He daihti he seminary la si awpata admission pahyna daihtizy a cha khaoleipa vata Bia ryureina zy ei chu khona tlokhei lai awpata cha heih ta, chavata a pahapa tluta Tisi khih (tahma Elino) khih liata Private Middle School liata head ta ei vaw chakao. Ei naw! Tisi liata ei vaw y chhoh he cha chhona liata ei rie athei hmeiseipa ta ei pahno. Keima chhao he chyhsa nokhihpa cha nata ei hrozi chhao ei kaolapa y thai hra va ei. Chavata ei sanawhzy liata ahlu via cha ei vaw y thla tyh.

       Cha ko vaw chha ta 1984 na vaw pha haw ta. He ko general Assembly chata Bihrai achu awpata naw pasai ta ei vaw ly kaw. Chavata 1984-85 na liata B.Th ko khana a vaw chu nata 1990 liata ei vaw patlo. Ei chu chhoh zydua liata panona liata thaina lata ei vaw y lyma hra. Abeipa ei reih thai ngasa. Ei vaw patlo tawhta pastor Sita paw kyh (Leika local Church) liata achytae buana a ypa vata nama buakha khy chy ma ei na tah eita ei nawtae asipa Ko-U nata khy pita noza zakha za y pita cha daihti liata Hyutuhpa Letla O liata eima y tyh. Awnanopazy kyh maniah pacha kaw ei ta ei ly ngasa. 1990 na April liata a cha. Khih la azu pita pastor Sita paw kyh cha apha haw bapa vata keima he su ruapa Tisi khih lata si awpata bie ei na pie heih ei. Chavata saya ei cha tuana khih lacha May thla chhana liata si heih nata he liata ko no lai ta ei vaw y. Chavata Elino chhao he he daihti liata ei mo nata na dyh viapa a chapa vata ei pao Ngofamapaw ta na vahiapa ta ko 1991 na May 19 noh liata ava suana hry ta eima pakiah. He a pakiah noh he Abeipa Vala kiahno nata asu thai ta Pro. Victor Ve-U (cha daihti) tha bie maniah a pachu. Ko 1992 na liata B.D achu heih awpata hia nata Assembly nopawzy ta naw pasaih heih eita chahrasala Elino (Dawhdaw) he naw pina daihti ahnia haw ta ei ngia eina chhipa nata phaosa zy aryh leina vata MIT liata first year kia awpa a chapa chhaota kia leipata ei kaw si haw.

     Fao daihti cha ta ti zy alai kawpa chhaota ei lapino yna su Tisi cha vaw tlo heih nata he daihti liata Rili paw (M. Vahnei) he Sabypi liata biatuhpa ta sopa chata ama ochhono (Khaiche, late) he Pletwa liata chakaona a hneipa a chapa vata keima Pletwa su aruapa pabie awpata ei natuapa ei he Rili paw zu hri awpata paryhpa a cha. Keima chhao Pletwa liata (1992 na August liata) no za zakha y nata ei kaw si pakhaw haw hra. Ei kaw si tawhta Sabypi Biatuhpa ta cha nata Dawlei bia chhao aruapa vata ko kha chho ei tlypa tyh lyma hra. Chatawhta achu heih awpata khopasana ei hnei heihpa vata Aru Assembly (1995) liata hia heih nata na pasai ei ta he ko tlai he ei nawtae Ko-U nata eima za si haw. MIT liata pre-class kia awpata achapa vata saya Khalei paw o liata 1995 June-August taita eima y. Chatawta Rev. Laima ta ano school liata baopa pata ei na chhopa vata ano yna Chinchia (Thabigun) la eima paly haw. He ko December liata Elino zy dy awpata khih la Ko-U nata khy heih pita krisma he khih liata hmapata Krisma myla ta thlai Yangon pangai awpta eima zydua ta eima zathao haw.

     Lathloh liata Elino a za pasapa lyma pa chhaota Abeipa ngiachhina vata atla ngasapa ta Yangon cha January first week, 1996 na liata eima zapha haw. Eima y nawpa chhao arypao khai thla ta alypa a cha ngasa. Elino zy chhao ta Yangon liata kotho y heih pita keima (1999) B.D ei patlo nata khih la eima zydua ta kaw si pita chahrasala he ko General Assembly ta Hakha liata local padua awpata ei tlo hmata maniah ama rao chili hawpa vata Matupi tawhta eima hmodahzy cha eima utah Ngohmopa motor ta Hakha la thlai paphaosa hawhpa a cha. Khih he April second week liata tlo pita Tisi liata noza zakha nata Sabypi liata noza zano y pita sao mania tla kha va na atah hawpa vata Hakha lacha May thla 17 noh nozy aduahno ta eima thyu. Lapi liata pasapa lyma heih pita chahrasala Hakha cha May thla 23 noh Zapi noh ta eima tlo. Hakha liata utheizy maniah aly kaw ei ta eima rietheina zydua a leikhai haw.

     Hakha liata 1999 tawhta Abeipa ngiachhina vata vaw y lyma pita awnanopazy deichhyna eima vaw to pha lyma. 2002 liata M.Th achu awpata hia nata Assembly ta ary a tahpa vata 2003 na August 27 noh he Korea rah Hanil Seminary, Jeonju khih liata ei vaw tlo. Abeipa baona vata 2004 na August 20 noh he M.Th palo tla ngasana chota patlopa ta Viarah la ei vawtlo pakhaw haw. Chatawhta LTC liata lecturer ta chakao nata  Abeipa ryhraona va lilaw heihta 2005 na February liata Korea rah Methodist Seminary tawhta hruana ei vaw hmopa vata he ko March 1 noh ta Korea, Seoul khihpi liata achu heih awpata ei vaw tlo. Tahma taih he he liata ei vaw y chy thla haw.

Eli he Abeipa ngiachhina vata Tari 21 August, 1992 ta a pipa a cha. Ano he maniah a deichhy kawpa eima saw chano hmiatuapa a cha.

ein Bild

      
ein Bild

Lili Si he  Abeipa ngiachhina vata tari 15 February 1995 liata a pipa a cha. Ochho khisa na liata no nata paw zy kyh maniah apacha kawpa a cha.

ein Bild               

VA PAWPI he myla Krisma acha ba aw tahpa December 24 my 1:00 am liata pi ta Abeipa ngiachhina vata a lathli lachha a chatli kawpa a cha. Ko charu na liata "Ei Paw! Khazohpa cha Alei nata Ava atao khiahtacha he Alei nata Ava atao hla he khapa e atao tyh?" na tah ta, Bihrai ko hlupi achupa ei chapa chhao ta achhy pala awpa vaw hnei leina tai ta ei y. ( Pinoh: 24 December, 2000 Sunday).
                 ein Bild   

 
   
 
=> Do you also want a homepage for free? Then click here! <=